Matthew 14

Di made o John Babdais

(Mark 6.14-29; Luke 9.7-9)

1Di madagoaa deelaa, Herod di tagi o Galilee ga longono ia di hai o Jesus. 2Mee ga helekai gi ana daane hai hegau, “Ma go John Babdais hua dela ne mouli aga, i mee ono mogobuna e hai ana mee haga goboina dangada.” 3Idimaa, Herod ne hai dana haga iloo bolo gi kumidia John, gei digaula ga nnoo nia lima o maa, ga haa a mee gi lodo di hale galabudi. Mee ne hai di mee deenei mai di gili o Herodias, go di lodo o dono duaahina daane go Philip. ^a 4John ne hagi anga gi Herod boloo, “Ma hagalee donu di hai doo lodo gi Herodias!” ^b 5Herod gu hiihai bolo ia ga daaligi a John, geia e lliga huoloo i digau o Jew ala gu hai bolo John la soukohp. 6I di laangi haanau o Herod, tama ahina a Herodias ne duu aga, ga hai ana gaalege i mua digau dogologo. Gei Herod gu tentene huoloo, 7ga hai dana hagababa, “Au e hagamodu bolo au e gowadu di ingoo hua di mee dela e hiihai ginai goe!” 8Tama ahina ga hagi anga telekai dono dinana, ga dangi ang gi Herod, “Gaamai gi di au di libogo o John Babdais i hongo di pileedi!” 9Di king gu manawa gee huoloo i nnelekai tama ahina deelaa. Gei mee ga helekai bolo gi hagagila ina di hiihai a tama ahina, idimaa dana hagamodudahi mo dana hagababa ne hai i mua nia daangada o tagamiami. 10Mee ga helekai gi digaula bolo gi tuudia di ua o John dela i lodo di hale galabudi. 11Digaula ga gaamai di libogo i hongo di pileedi gi tama ahina, geia ga kae gi dono dinana. 12Nia dama agoago a John ga lloomoi ga kae tuaidina o maa, ga danu, ga hula ga haga iloo gi Jesus.

Jesus e haangai ana daane e lima mana (5,000)

(Mark 6.30-44; Luke 9.10-17; John 6.1-14)

13Jesus ne longono ia di longo deenei, geia ga hagatanga i di gowaa deelaa, ga hana i di boodi gi di gowaa lomo modogoia. Gei nia daangada ne longono ginaadou dono hana, ga hagatanga i nadau waahale ga daudali a mee mai laa uda. 14I dono doo aga i di boodi, geia ga gidee ia digau dogologowaahee, mee gu aloho huoloo i digaula, ga hagahili nadau magi. 15Ga hiahi ia hua di mee, ana dama agoago ga mmaanege adu gi mee, ga helekai, “Ma gu boo, gei di maa di anggowaa lomo deenei, hagau ina digaula, e hui nadau meegai i lodo nia waahale lligi aalaa.” 16Jesus ga helekai, “Digaula hagalee hagau. Wanga ina nia mee digaula e gai!” 17Digaula ga helekai gi mee, “Ma nia palaawaa hua e lima ge lua dama iga ala i madau baahi.” 18Jesus ga helekai, “Gaamai nia maa gi di au.” 19Gei mee ga helekai gi nia daangada gi noho gi hongo nia geinga tolo, gei mee ga daahi aga nia palaawaa e lima ge lua dama iga, ga hila gi di langi, ga danggee gi God, ga ginigini nia palaawaa aalaa, ga wanga gi ana dama agoago, ga duwwe gi nia daangada. 20Digaula huogodoo ga miami gu maaluu. Gei nia dama agoago ga haa nia mee ala ne dubu, gu hai nia gada e madangaholu maa lua. 21Togologo daane ala ne miami, digau e lima mana (5,000), nia ahina mono dama digi daulia.

Jesus e haele i hongo tai

(Mark 6.45-52; John 6.15-21)

22Jesus ga helekai gi ana dama agoago gi kaga gi hongo di boodi gi hula i ono mua gi di baahi i golo tai deelaa, gei mee ga hagau digau dogologo aalaa gi hula. 23I muli dana hagau nia daangada gi hula, gei mee ga hana gi hongo tama gowaa nnoonua belee dalodalo. Ga dae loo gi di hiahi, mee nogo modogoia hua. 24Di madagoaa deelaa, gei di boodi la gu i tungaalodo di tai deelaa, gu huduhudu go nia beau, idimaa, di madangi la gu gono mai i mua. 25Ga dae loo gi di boo mehanga di laa e dolu mo di laa e ono luada, Jesus ga haele adu gi digaula i hongo tai. 26Nia dama agoago a maa ga mmada gi mee e haele i hongo tai, gei gu wwolowwolo mmaadagu bolo ma di ieidu. 27Di madagoaa hua deelaa, Jesus ga helekai gi digaula, “Goodou hagadagadagagee. Ma ko au deenei. Goodou hudee mmaadagu!” 28Peter ga helekai, “Meenei Tagi. E donu maa kooe deenaa, helekai mai gi di au gi haele adu au gi di goe i hongo tai.” 29Jesus ga helekai, “Hanimoi laa!” Gei Peter ga doo ia gi daha mo di boodi, ga duu gi hongo tai ga haele gi Jesus. 30Di madagoaa hua Peter ne longono ia hua di mahi o di madangi, geia gu madagu ga daamada ga abulu gi lala. Geia ga wolo boloo, “Meenei! hila mai!” 31Di madagoaa hua deelaa, Jesus ga daahi adu dono lima ga dahi aga a mee, ga helekai, “Doo hagadonu le e dulii, goe e aha dela e manawa lua?” 32Meemaa ga kaga gi hongo di boodi, gei di madangi gu kila. 33Ana dama agoago ga pala ang gi Jesus i hongo di boodi, ga helekai, “Ma e donu hua bolo goe go Tama a God!”

Jesus e hagahili ana magi i Gennesaret

(Mark 6.53-56)

34Digaula ga dele adu, ga dau aga i Gennesaret. 35Digau o di guongo deelaa ga modongoohia Jesus, ga haga iloo gi digau magi o di gowaa deelaa mono gowaa ala e hoohoo mai gi lloomoi , ga laha mai nadau gau magi gi Jesus. 36Digaula ga tangi gi mee gi dumaalia ang gi digau magi gi pili hua gi di bida o dono gahu, malaa, digau huogodoo ala ne pili gi dono gahu la gu hili.